[分享]Hmoob Kev Txom Nyem

Peb Hmoob lub neej nyob Xeev Khuam txij li xyoo 1996 los no, luag nom tswv Nplog liab tsis pub peb Hmoob luaj teb ntov ntoo ces Hmoob mam li mus pib nrhiav liaj ua. Liaj nyob Mab Sua tes tag ces mam mus puab tej kaum dej kaum hav ua liaj. Tos ntuj nag los thiaj muaj dej ua liaj. Muaj tej xyoo ntuj nag los lig ces tshaib plab; tseem tau mus ua Mab ua Suav zog noj.

Muaj ib txhia niaj hnub no tseem npaj tsiv rau ub rau no yam ib cov niag ntsaum dub nyob tsis muaj chaw. Yuav los nag ces niaj hnub npaj nra khiav rau ub rau no yam li tej nas noog nrhiav txiv noj.

Peb lub teb chaws mas txog rau lub 3 hlis los 4 hlis uas yog ntuj qhua mas hluav taws plam rau toj roob tej kub peb hnub peb hmos hluav taws tsis tuag li. Toj roob kub hnyiab du dos...me nas me noog twb tsis muaj chaw nkaum li. Tsis tas li ntawd, nce mus txog pem tej laj roob los laj roob do dus xwb tsis muaj dab tsi li.

Hais txog txoj kev txom nyem, nyob Xeev Khuam, niaj hnub no muaj ib txhia Hmoob nyob ntawm nroog kiab khw los yog ib thaj tsam ze ntawm Phus Xam Vaam. Lawv lub siab yeej tsis nyiam mus nrog luag khwv. Haus yeeb txhua tus...tas niam tub txiv nyuag thiab ua tau tej lub tsev luaj cooj qaib xwb. Lawv tseem mus khaws tej niag khauj khaum ntawv los xov tsev thiab khaws khaub ntaub tiv nag los vov tsev xwb. Niaj hnub mus ua Pub Thawj zog ntsaig khoom hauv tsheb. Tej poj niam niaj hnub mus ua Pub Thawj zog ntxhua khaub ncaws. Tej hnub tau ob txhiab peb txhiab nyiaj coj los yuav yeeb haus. Tej zaum muab yuav yeeb ho tsis tau txhuv los ua hmo ces cial i pw ib hmos kaj ntug mam mus nrhiav los ua tshais xwb. Ua neej nyob tej tug ceb muag zees xwb.