东山苗族丧歌

作者:陶连红    来源:三苗网    时间:2015-03-31    点击量:
评论: (我要评论)

东山苗族是对文山壮族苗族自治州麻栗坡县天保镇东山战场原址片区苗族同胞的总称,东山苗族由八里河、苏麻湾和马安山三个苗寨组成,属于白苗支系,长久以来共用一首丧歌,歌词内容如下:

Lol Zax Zal
Ad,Touf lit it,ib lob ndox nzif shik lak,ib lob deb nzif shik vongs。Lob ndax deb zux lit louk pongf ged blax ghous lak mol,ib lob deb nzif shik vongs, ib lob ndox nzif shik lak ,Lob ndax deb zux lit louk pongf ged blax ghous lak zos。Dlex yis lit zot ceud ghangb reb,ib lenx gud jaox lenx dix del bel lous ,yuad mol muab dol lit dlex yis lit zot,jaox lol troub shod lit shad duad ndruab del yuad lol nzuad DOB LIT DUAS nghel ndax deb。 Dlex yis lit zot ceud ghangb jangd,ib lenx dob dex lenx gid loux bel nangt ,yuad mol nghangt dol dlex yis lit zot,jaox lol troub shod lit sheud duad ndruab blangs,yuad lol nzuad DOB LIT DUAS nghel ndax ndrangd。
Touf lit it,dol lit zit sheud uat ngoux ,NGOUX LIT AB sheud uat ngoux , dol lit zit sheud uat ndrous,ZID NDROUS LIT ONGD sheud uat ndrous。NGOUX LIT AB tab ZID NDROUS LIT ONGD mol uat nenx drout ndangd ndox,mol uat nex mol zhik yongs zox,mol uat nenx drout ndangd hlit mol uat nex mol zhik yongs jit。 NGOUX LIT AB tab ZID NDROUS LIT ONGD droud lol zos,lol uat nenx drout ndangd hlit lol uat nenx mol yongs jit, lol uat nenx drout ndangd ndox lol uat nenx mol yongs zox。NGOUX LIT AB jed hnyangd shik lol jed muax git, jed hnyangd shik keb jed muax dob。NGOUX LIT AB tab ZID NDROUS LIT ONGD yuad dot dob lol dot git,yuad lol nongs ib box shoub。Ib box shoub yuad lol haik lol dot dob lol dot git,dot ndeuf zox hlangb lit qoub,lol dot git lol dot dob 。Zhik yongs luas jek dot,yuad lol dot ndeuf zox hlangb lit nbuas。NGOUX LIT AB tab ZID NDROUS LIT ONGD shenb ib lit dol yuad muax nbet,NGOUX LIT AB tab ZID NDROUS LIT ONGD zhik bof ged mol drik nbet,drik uat JIF LIT DOT。
JIF LIT DOT hlob dad zox,JIF LIT DOT sheud drangs ndox,JIF LIT DOT hlob dad zid,JIF LIT DOT sheud drangs hlit。JIF LIT DOT yuad lol zot njaox yul ghangd lit geuk mol nzuak deb mol nzuak ndox,njaox yul ghangd lit geuk druk lit nzes mol beb hnob beb ghuak ndox,druk shik nzes mol beb hmaot beb ghuak ndrangt。njaox yul ghangd lit geuk drout lol zos,JIF LIT DOT yuad lol nongs ,njaox yul ghangd lit geuk god zot gaox mol nzuak deb mol nzuak ndox,ib lob ndox dlangd lit rod lak zhik dlangd,ib lob deb dleb lit rod lak zhik dleb net njaox yul ghangd lit geuk。njaox yul ghangd lit geuk yuad lol haik gaox JIF LIT DOT gaox zot god mol nzuak ndox mol nzuak deb,druk lit nzes nzuak beb hnob beb ghuak ndox,druk lit nzes nzuak beb hmaot beb ghuak ndrangt。Ib lob ndox nghaif lit ncid lit shib del,mol zhik dout rouf lit bok nzux shik nyos dol nend nyox,Ib lob deb nghaif lit tluad lit shib deut,mol zhik dout rouf lit bok nzux shik nyos dol nenb nenk。Ib lob deb nghaif lit ncid lit shib deut,Ib lob ndox nghaif lit tluab lit shib del,lob ndax deb dib lit nens nens nyaob zhik dout qeut dlangb nyaob zhik dout ndraif,lob ndax deb dib lit nens jongb lit rod drik uat jongb,lob ndax deb dib lit nens ndout lit rod drik uat ndout。Lob ndax deb nblongx zhik rens rongt zhik gangx,lob ndax deb dib lit nens zhik blax zhik duas,lob ndax deb nzif shib dangs nex JIF LIT DOT。JIF LIT DOT yuad lol zot ib dlangd dlob ib dlangd shent mol nzuak deb mol nzuak ndox,ib dlangd dlob ib dlangd shent druk lit nzes mol beb hmaot beb ghuak drangt ,druk lit nzes mol beb hnob beb ghuak ndox。Ib dlangd dlob ib dlangd shent drout lol zos,JIF LIT DOT yuad lol nongs ib dlangd dlob ib dlangd shent god zot gaox mol nzuak deb mol nzuak ndox,ib lob ndox dlangd lit rod lak zhik dlangd,ib lob deb dleb lit rod lak zhik dleb net ib dlangd dlob ib dlangd shent。Ib dlangd dlob ib dlangd shent yuad lol haik gaox JIF LIT DOT god mol nzuak deb mol nzuak ndox,god drul lit nzes nzuak beb hmaot beb ghuak ndrangt,drul shik nzes nzuak beb hnob beb ghuak ndox。Ib lob ndox dleb lit rod drik uat dleb mol zhik dout rouf lit bok nzux shik nyos houd bouk reb,ib lob deb dlangd lit rod drik uat dlangd mol zhik dout rouf lit bok nzux shik nyos houd bouk jangd。Ib lob deb dleb lit rod drik uat dleb,lob ndax deb dib lit nens shoud lit rol zhik bod lob ndax deb lob bouk reb。 Ib lob ndox dlangd lit rod drik uat dlangd ,lob ndax deb dib lit nens shoud shik rol zhik gouf lob ndax deb lob bouk reb gouf hangd net JIF LIT DOT。JIF LIT DOT yuad lol ndouk njoux yul ghangt lit geuk beb dluad nyox,njoux yul ghangt lit geuk duas lol mol nzhoub hout nzend nzux shik nyos dol nend nyox。Yuad lol ndouk njoux yul ghangt lit geuk beb dluad nenk, njoux yul ghangt lit geuk duas lol mol nzhoub hout nzend nzux shik nyos dol nend nenk。Njoux yul ghangt lit geuk duas lol mol bod ib zot gouf beb hnob ,duas lol mol bod ib zot gouf beb nyos。Njoux yul ghangt lit geuk drout lol zos,yuad lol guaf dex lenx hlob sheud kheb drongx,dex lenx hlob zuak zhik kheb guaf lenx yout sheud troub dlex,dex lenx yout zuak zhik troub。Ib dlangb duas lol dreuk juas god njoux yul ghangt lit geuk,njoux yul ghangt lit geuk yuad lol haik lob ndax deb dib lit nens shab zhik rongt,lob ndax deb dib lit nens shab zhik dax。Touf lit it nenx dleub hout lit bous dlob hout lit bous duas lol mol mol zenx lol,nik nat dleub hout lit bous dlob hout lit bous duas lol mol zhik zeux lol。Duas lol mol bod ib zot gouf beb hnob ,Duas lol mol bod ib zot gouf beb nyos。Yuad lol uat dol nzox dluab lit xut droud lol zos rouf lit bok dex ghangb zat rouf lit truad dex ghangb job ek nex DOB LIT DUAS。Zox gangb lit ged mol yaos lit drout ndeuf it nex DOB LIT DUAS。
JIF LIT DOT,ib lob ndox khuad lit kheud mol xangt xongt,ib lob deb khuad lit ndris mol xangt nex。Ib nongb xongb duas dot nongb ,ib nongb xongb zuas zhik cuad 。JIF LIT DOT zod zif lit drangx yuad mol dros nzux shik nyos muab nongb xongb,zif lit drangx drul shik nzes zheuk shik ntruad nzux shik nyos lob drongx vangs, zif lit drangx ghuax beb rangs ,nzux shik nyos kheb lit hlat lob drongx vangs。Nzux shik nyos yuad lol haik zif lit drangx, gaox yaos lob ndax deb dib lit nens gaox yuad duax uat dol lik zhit zif lit drangx。Zif lit drangx yuad lol haik ib lob deb khuad lit kheud mol xangt xongt, ib lob ndox khuad lit ndris mol xangt nex。Ib nongb xongb duas dot nongb,ib nongb xongb zuas zhik cuad。JIF LIT DOT zot lit pluad zif lit drangx yuad duax ndros gaox nzux shik nyos muab nongb xongb ek nzux shik nyos。Nzux shik nyos kheb lit hlat lob drongx longs zuab shik ras mol beb del nongb lit xongb eut lit heud mol nrangf hangd,luas dex it luas zeux nghangt luas yuad uat ib ngheuk dab ngheuk eut ghangt。Zif lit drangx zhik zeux nghangt,nghangt lit hlat ndeuf gouk njoux ,nghangt lit hlat mol get zoux,nghangt lit hlat mol get bongb。Bongb lit ntangd mol beb dol nongb lit xongb drout ndruab dleuf duax beb dol nongb lit xongb 。Muax ib dol nangk gak dol ,nuk yuad zad shik ras nuk ib dol。Muax ib dol yaox nex mangb dex nex shuad nuk ib dol,nuk yuad zad shik ras nuk ib dol yuad jaox mol mol heb vangb droud lol yongf。Cuad ib dol yaos dout gaox DOB LIT DUAS gaox lit dol,blongx nzuab lit shab mol ndat nzik,nzik yuad nzuab lit shab mol ndat ndox。Ib lit dras aob daos dot ndruab lit ndrangb npuat lit pleud mol aob shangb。Yuad lol uat DOB LIT DUAS zuf shib ndeus,yuad zuat dout DOB LIT DUAS lob lit bleud,ib shangb kheb mol shangb ghak nenx nduak zos dlangb dak yaos nex DOB LIT DUAS drout ndeuf nat。
Touf lit it,ib lob deb khuad lit kheud mol xangt xongt,ib lob ndox khuad lit ndris mol xangt nex。Ib nongb ndongt duas dot nongb ,ib nongb ndongt zuas zhik cuad 。JIF LIT DOT zod lit pluad zif lit drangx yuad mol dros nzux shik nyos muab nongb ndongt,zif lit drangx drul shik nzes zheuk lit ntruad nzux shik nyos lob drongx vangs, zif lit drangx ghuax beb rangs ,nzux shik nyos kheb lit hlat lob drongx vangs。Nzux shik nyos yuad lol haik zif lit drangx, gaox yaos lob ndax deb dib lit nens gaox yuad duax uat dol lik zhit zif lit drangx。Zif lit drangx yuad lol haik yaos ib lob ndox khuad lit kheud mol xangt xongt, ib lob deb khuad lit ndris mol xangt nex。Ib nongb ndongt duas dot nongb,ib nongb ndongt zuas zhik muax。JIF LIT DOT zot god zif lit drangx yuad duax ndros gaox nzux shik nyos muab nongb xongb ek nzux shik nyos。Nzux shik nyos kheb lit hlat lob drongx longs zuab shik ras mol beb del nongb lit ndongt eut shik heud mol ndrangf hangd,luas dex it luas zeux nghangt luas yuad uat ib ngheuk dab ngheuk eut nghangt。Zif lit drangx zhik zeux nghangt,nghangt lit hlat ndeuf gouk njoux ,nghangt lit hlat mol get zoux,nghangt lit hlat mol get bongb。Bongb lit ntangd mol beb dol nongb lit ndongt drout ndruab drongb duax beb dol nongb lit ndongt 。Muax ib dol yaox nex mangb dex nex shuad nuk ib dol,nuk yuad zad shik ras nuk ib dol yuad jaox mol mol uat vangx mol uat zhed droud lol nyaob。Cuad ib ngeuf yaos dout gaox DOB LIT DUAS gaox lit dol,blongx nzuab lit shab mol ndat nzik,nzik nzuab shik shab mol ndat ndox。Ib lit dras aob daos dot ndruab lit ndrangb npuat uat dout gaox DOB LIT DUAS dol nenk dlangb dol nenk juad。Yuad jaox drout gaox DOB LIT DUAS mol boux dlangb mol boux khuat drout ndeuf nat。
DOB LIT DUAS gaox uat rangf lit rot gaox yuad mol,yuad shet shid mol zix jous yuad drout ntrongb mol zix dluad。Uat rangf lit rot gaox yuad mol,yuad jaix dout dol nenk rangs yuad mol zos naf zid dlangb drongx lit dangk,naf zid dlangb drongx lit dangk yuad lol haik gaox yaos lob ndax deb dib lit nens ek gaox yuad lol wef dol lit zhit 。DOB LIT DUAS gaox yuad haik yaos lob ndax deb maob deb maob zhik zhes,lob ndax deb maob deb maob zhik drongx。Ib ZID CUAX nyaob ghangb reb dreuk ZID CUAX dreuk zhik feb,ib ZID NENB nyaob ghangb zhuat dreuk ZID NENB dreuk zhik juas。Lob ndax deb maob deb maob zhik zhes,zox bangt dot lit ntrat duas ndeuf del,lob ndax deb maob deb maob zhik nzoux,zox bangt dot lit ntrat duas ndeuf njoux。Dex lol naf zid dlangb drongx lit dangk luas lit ncid yuad lol zot gaox DOB LIT DUAS mol juas box mol juas yeus drout shangb ndox mol ndrouf it nex DOB LIT DUAS 。DOB LIT DUAS gaox uat rangf lit rot gaox yuad mol,yuad drout ntrongb mol zix dluad yuad shet shid mol zix pus。Uat rangf lit rot gaox yuad mol,yuad jaix dout dol nenk juad yuad mol zos naf zid dlangb qeb blangs lit Suat,naf zid dlangb qeb blangs lit Suat yuad lol nongs gaox yaos lob ndax deb dib lit nens gaox yuad lol uat dol lit zhik nek DOB LIT DUAS。DOB LIT DUAS gaox yuad haik yaos lob ndax deb maob deb maob zhik nzoux,zox bangt dot lit trat duas ndeuf njoux。Lob ndax deb maob deb maob zhik nzes,zox bangt dot lit trat duas ndeuf del。Dex lol naf zid dlangb qeb blangs lit suat luas ghak ncob yuad lol zot gaox DOB LIT DUAS mol juas box mol juas yeus drout shangb ndox mol ndrouf ob nex DOB LIT DUAS 。DOB LIT DUAS gaox uat rangf lit rot gaox yuad mol,yuad jaix dout dol nenk juad yuad mol zos ndox cangd mol deb kuad ,luas yuad muab luas nzuaf nzaix lol nzuaf yongd,gaox yuad muab gaox nzuaf ndoub lol nzuaf juat。Cex mol juas dout gaox bof gaox lit yues drout shangb ndox mol drouf ob nex DOB LIT DUAS。DOB LIT DUAS gaox uat rangf lit rot gaox yuad mol,yuad mol jaix dout dol nenk ndongt,yuad mol zos ndox nzis deb zouk lit dris dex vongs rongd。Luas yuad muab luas nzuaf nzaix lol nzuaf yongd,gaox yuad muab gaox nzuaf ndoub lol nzuaf juat。Cex mol juas dout gaox bof gaox lit yues nex DOB LIT DUAS。DOB LIT DUAS gaox uat rangf lit rot gaox yuad mol,yuad jaix dout dol nenk hleb ,yuad mol zos yinb dik deb ndox gangx lit dris dik uat gangx,luas yuad muab luas ghouk ndoub lol drongk nangs,gaox yuad muab gaox ghouk ndeud lol drongk cangd,cex mol juas dout gaox bof gaox lit yues nex DOB LIT DUAS 。DOB LIT DUAS gaox uat rangf lit rot gaox yuad mol ,gaox yuad jaix dout dol nenk rangs yuad mol zos yinb dik ndrangt ,luas yuad muab luas ghouk ndoub lol drongk cangd ,gaox yuad muab gaox ghouk ndoub lol drongk nangs。Cex lit juas dout gaox bof gaox lit yeus nex DOB LIT DUAS。DOB LIT DUAS gaox uat rangf lit rot gaox yuad mol。
Touf lit it,dol lik zhit zhif nongb ok,YEUF LIT SHOUB zhif nongb ok。dol lik zhit zhif nongb ghaib,IB BOX SHOUB zhif nongb ghaib。Ib nongb ok BOX LIT SHOUB mol zhik muax,ib nongb ghaib IB BOX SHOUB mol zhik dout。Ib lit hnob ndes ib lob, aob lit hnob ndes aob lob,nbeb lit hnob ndes beb lob,bloub lit hnob ndes boub lob, zhib lit hnob ndes zhib lob,drout lit hnob ndes drout lob,xangt lit hnob ndes xangt lob,yif lit hnob ndes yif lob,juax lit hnob ndes juax lob,gouf lit hnob ndes gouf lob。Ndes lol mol bod ib zot gouf beb hnob,Ndes lol mol bod ib zot gouf beb nyos。Yuad ndes dout gouf beb lob buas lol mol bod ib zot gouf beb hnob,buas lol mol bod ib zot gouf beb nyos。Ib box ghaib zhik zuex buas zhik zeux dlad,yangf shik ncit uat kheb dad,nbuas lol zhik njeuk njoux,Plax shik ncit uat ghet ghoux。Dlous dout beb lit dol,muax ib dol jif lit dot,muax ib dol ib dlangd dlob dlangd shent dol,muax ib dol yaos dout gaox DOB LIT DUAS gaox lit dol。Plik lit plat uat ghaib gaik,yuad lol uat DOB LIT DUAS ghaib nbas daik。Plik lit plat uat ghaib sheb,yuad lol uat DOB LIT DUAS ghaib nbas hleb nek DOB LIT DUAS。
DOB LIT DUAS uat rangf lit rot gaox yuad mol,cangd ndox lit ndris luas yuad ndraif lit ncit dex ghaib dut,gaox yuad ndraif lit ntruad dex ghaib dik ,cex lit mol juas dout gaox bos gaox lit yeus nek DOB LIT DUAS。DOB LIT DUAS uat rangf lit rot gaox yuad mol ,yuad lol nangs cex shik ncit mol yinb kut ,luas yuad ndraif lit ncit dex ghaib dik,gaox yuad ndraif lit ntruad dex ghaib dut,cex lit mol juas dout gaox bos gaox lit yeus nek DOB LIT DUAS。DOB LIT DUAS uat rangf lit rot gaox yuad mol,dol uat gaox ghaib ghuad luas ghaib deb ,zhik yaos gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,dol uat luas ghaib ghuad gaox ghaib deb,cex yaos gaox bos gaox lit yeus nek DOB LIT DUAS。
DOB LIT DUAS uat rangf lit rot gaox yuad mol,luas shot zheuk bef daox,luas yuad muab luas dlex lit rot luas shot naox。Gaox shot zheuk ndrangf dous,gaox yuad muab gaox dlex lit rot gaox shot houk。DOB LIT DUAS uat rangf lit rot gaox yuad mol,luas shot zheuk ndrangf dous,luas yuad muab luas dlex lit rot luas shot houk。Gaox shot zheuk bef daox,gaox yuad muab gaox dlex lit rot gaox shot naox。Cex mol juas dout gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,luas yuad muab luas cat zox cat nbuat hnangt。DOB LIT DUAS gaox yuad muab gaox cat zox cat nbuat hnangt,yuad mol nongs ib njex dat dex njex zhas ndeuf ndruab ndrangb,yuad mol ndros ib njex dat dex njex zhas muab cat zox cat nbuat hnangd,Cex mol juas dout gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,zox ged mol bef daox yaos nex mangb dex nex shuad zox ged uat luaf naox 。Zox ged mol ndrangf dous yaos nex mangb dex nex shuad zox ged uat luaf houk。Zox ged ndruab lit ndrangb nend nyox hlux shik nzeuk nend nenk hlux shik ntoub,DOB LIT DUAS gaox yuad mol cex boub yaos zox ged mol juas gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,dol uat naf dout naf nghent shik lat,zid dout zid jos ngheuk cat,zid dout zid nghent shik keb,naf dout naf jos ngheuk dab ,zhik yaos gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,dol uat naf dout naf nghangt bleuf dongx,zid dout zid nghangt bleuf hlout,naf dout naf lol nongs dout,zid dout zid zhuak yuad ndout,dol cex yaos gaox bos gaox lit yeus nex DOB LIT DUAS。DOB LIT DUAS uat rangf lit rot gaox yuad mol,luas yuad muab luas koub mangx koub nduas drout,luas yuad ked dex ghangb dab dex ghangb cat yangd lit plat。Gaox yuad muab gaox koub mangx koub nduas drout,yuad mol njet nzux shik nyos dax lit nzis zax ghangb nat。DOB LIT DUAS uat rangf lit rok gaox yuad mol,luas yuad muab koub mangx lit dab koub nduas drout,luas yuad ked luas ghangb dab dex ghangb cat rangf shik nzis,gaox yuad muab gaox koub mangx koub nduas drout,yuad mol njet nzux shik nyos dax lit nzis zax ghangb luas。DOB LIT DUAS uat rangf lit rot gaox yuad mol,gaox bos gaox lit yeus yuad lol nongs gaox yaos lob ndax deb dib lit nens dol lit zhit shangt gaox lol yaos lenx dul shangt gaox duax。DOB LIT DUAS gaox yuad haik yaos ndax deb muax ib dol zid yeus zid lit shid deut luas dut lit deut,but lit ncid luas dut qeut,del luas dut lit del,but lit ncit luas dut rek。Nzex luas nzuaf ,muab luas koub ,ib lit druaf ib lob drongb,beb lit druaf beb lob hangd。Hnob nat shangt god duax bongb dout yinb yangx lit rot dex yinb gangb,nangs lit it nuk drout ghangb lit rot drout feb gangb。Hnob nat shangt god duax bongb dout yinb deb dex yangt ged,nangs lit it nuk drout ghangb lit rot drout feb zhed。DOB LIT DUAS gaox zox gangb lit rot dous zhik dout,gaox zox lut dous zhik juas nex DOB LIT DUAS。DOB LIT DUAS uat rangf lit rod gaox yuad mol,gaox muax kout mangx lit rot kout nduas drout,nzet lit ncit mit nongs lax dex nongs lod。Drus lit nzes nzux shik nyos ghangb ndox hod,god zhik muax ib kout mangx ib kout nduas blax shik ncik drout lob yangx yinb hangd dlak cod。DOB LIT DUAS gaox muax kout mangx lit rot kout nduas drout,nzet lit ncit mit nongs lax dex nongs lod。Drus lit nzes nzux shik nyos ghangb ndox nzuab,god zhik muax ib kout mangx ib kout nduas drout,god blax lit ncit drout lob yangx yinb ndruab lol suab。DOB LIT DUAS gaox zox ghangb lit get dous zhik dout,zox lut dous zhik juas nex DOB LIT DUAS。
DOB LIT DUAS yuad sheut dout gaox gud gaox lit dix dex nzex xangb,hleud drous renk uat hluat jit,yuad jaox mol dangs lax ab deb qeuk nyaob dout shangb ndox mol drouf it nex DOB LIT DUAS 。DOB LIT DUAS uat rangf lit rot gaox yuad mol,yuad sheuk dout gaox dob gaox lit git dex zes ndeud,ndrous ghas rot uat hluat dlob,yuad jaox mol das lax ab deb qeuk nyaob drout shangb ndox mol ndrouf ob。
DOB LIT DUAS zes dout gaox gud gaox lit dix ib daos vangx ncad blit neb,zes dout lenx lit gud lenx lit dix shend bes yux yins ged hlux shab,zes dout lenx lit zid lenx lit dob ib dous longs ncad shik zheud,zes dout lenx dob lenx lit git shend yux yins ged hlux bleud nex DOB LIT DUAS。

口述:张友民
作者:陶连红(苗文记录)

标签: